اجتماع المدوّنين 12

على أساس انّو اللّقاء يكون عل السّاعة سبعة المسا، بس الانتظار شرط أساسي من الرّوتين اليومي. والاعتذار بكون ملوّن :"نسيت ساعتي بل البيت"، أو" ضيّعت الطّريق" أو "عجقة يا زلمي" أو حتّى "ناطر تعليق من أوكيوبايشن". بس المهمّ انو تلاقت المجموعة بعد غياب، وطلّتْ وجوه من السّفر وغيرها جديدة وبسرعة توجّهنا الى "مطعم منير" ببرمّانا، لأنو، بصراحة، صرلنا صايمين لهل الوليمة يومين ونصّ.

اهتمّت ايف بالتّرتيبات وحجزتْ طاولة حدّ الوادي (باسم السيّد إيف). كانت الفكرة حلوة خاصة وانّو بيروت كلّها بتبيّن بسهولة للقاعدين (وإنو حرام يكون في وادي وما نرمي حدا فيه!). بوب وجمال كانوا حايصين وعم يفرْكوا ايديهم: "بدنا نحكي سياسة يلاّ". و بعد توسّلاتنا، ضبطوا حالهن شوي. ومتل العادي، جرى تعريف بسيط من قبل كل شخص: هاشم كان أوّل ضحيّة، و شرحلنا أكتر عن اختصاصه "التشريحي"، بس ما نجح إنو يسدلنا قابليتنا للأكل. أحمد اعترف قدّيش بيكره شغله، اللي من ضمنه يسمع مشاكل النّاس عالتلفونات (إذا حدا عندو مشكلة، رقمه معي)! أنا من بيروت فسّر الفرق بين البلوغ والبيلوغ واشتكى إنو الجنس اللطيف ظالمه هالإيام. ديليريوس قدّمت اقتراحها الخاص عن المشكلة اللي شاغلة بال الكل: الفرق بين المجدرة والمدردرة (ممكن حدا يفكّلنا هالعقدة ويقلنا شو بالظبط الفرق بين المجدرة والمدردرة؟). بهل الوقت، قرّب النّادل عم يجرجرْ اجرو، وكأنّو عم بغنّي لأم كلثوم: "شو بتطلبو يا عيني؟".
ما كذّبنا خبر! ونزلتْ المازة اللّبنانيّة اللّذيذة عل السّريع.
ومين فيه يهرب من الحمّص و التّبولة وورق العنب؟ مالدورور اندمج بكاس العرق وضحى بعّدتْ صحن الكبّة النيّة عنها.
هل الوليمة بدّا صورة. بس نحنا يا جماعة منذكر بقية المدونين ببالنا وقلوبنا، لكن مش وقت يصير الحكي عن بطوننا.
وأصرّينا نعرف أكتر عن الوجوه الجديدة: رانيا وعدتنا انّو لح تخصّص وقت أكبر للكتابة بما انّو شغلها ما بيسمحلها. محمد راجع ع فرنسا ليكمّل الدكتوراه، وخبّرنا عن اجتماع سريّ للمدونين صار بتولوز. وريم موظّفة وعم تكفّي دراستها.
و قريب منّا، استمتع واحد ومرتو بأحاديثنا وسكّتها حتّى يركّز على أرقام سجلاتنا واسم المختار (من ضمن شروط التّعريف بالمدوّن).
و بلّشت هل العجقة، وفات ناس أشكال و ألوان. أكيد بدون ما ننسى الأولاد الملائكة وطبعاً بكاءهم المتواصل وممارسة أنشطتهم على بعد أمتار عنّا.
حسن طلع بيعرف تلت المطعم، و شو كان صار لو طوّلنا أكتر؟
و بعد الأكل، كانت التّحلية عبارة عن قسمين: تناول صحن سياسي دسم وهيدا شيء لا بدّ منّو والجلسة ما معقول تكمل بلاه، ومنظرنا نحنا وعم نقسّم الفاتورة.
و بحب شير لشغلة، انّو كنّا مجموعة صحيّة. 13 شخص وما حدا دخّن سيجارة واحدة!